ಕಲಬುರಗಿ: ಕರ್ನಾಟಕ ರಾಜ್ಯ (ಎನ್‍ಪಿಎಸ್) ಸರ್ಕಾರಿ ನೌಕರರ ಸಂಘದ ಜಿಲ್ಲಾ ಘಟಕದ ವತಿಯಿಂದ ಎನ್‍ಪಿಎಸ್ ಭದ್ರತೆ ಒದಗಿಸುವಂತೆ ಆಗ್ರಹಿಸಿ ಬುಧವಾರ ನಗರದಲ್ಲಿ ಪ್ರತಿಭಟನೆ ನಡೆಸಲಾಯಿತು.
ಎನ್‍ಪಿಎಸ್ ಯೋಜನೆ ಅಡಿ ಬರುವ ರಾಜ್ಯ ಸರ್ಕಾರಿ ನವಖರರನ್ನು ಹಾಗೂ ವಿವಿಧ ನಿಗಮ/ಮಂಡಳಿ ಮತ್ತು ಸ್ವಾಯತ್ತ ಸಂಸ್ಥೆಗಳಲ್ಲಿ 1-4-2006ರಿಂದ ಸರ್ಕಾರಿ ನೌಕರರಿಗೆ ಎನ್‍ಪಿಎಸ್ (ಪಿಂಚಣಿ) ಯೋಜನೆಯನ್ನು ಜಾರಿಗೊಳಿಸಬೇಕೆಂದು ನಗರದ ಸರ್ದಾರ ವಲ್ಲಭಭಾಯಿ ಪಟೇಲ್ ವೃತ್ತದಲ್ಲಿ ಬೃಹತ್ ಮೆರವಣಿಗೆ ನಡೆಸಿ ಜಗತ್ ವೃತ್ತದ ಮೂಲಕ ಹಾದು ಜಿಲ್ಲಾಧಿಕಾರಿ ಕಚೇರಿಗೆ ತೆರಳಿ ಜಿಲ್ಲಾಧಿಕಾರಿ ಮೂಲಕ ಮನವಿ ಸಲ್ಲಿಸಿದರು.
ನೌಕರರ ಸಂದ್ಯಾಕಾಲದ ಬದುಕಿಗೆ ಮತ್ತು ಮರಣ ಹೊಂದಿದ ಕುಟುಂಬದ ಜೀವನ ನಿರ್ವಹಣೆಗೆ ಈ ಯೋಜನೆಯ ಅಗತ್ಯವಿದ್ದು, ಕೂಡಲೇ ಈ ಯೋಜನೆಯನ್ನು ನೌಕರರಿಗೆ ಒದಗಿಸಬೇಕು ಎಂದು ಪ್ರತಿಭಟನಾಕಾರರು ಆಗ್ರಹಿಸಿದರು. ವಿವಿಧ ಇಲಾಖೆಯ ನೌಕರರು ಭಾಗವಹಿಸಿದ್ದರು.
ಸಂಘದ ಅಶೋಕ ಹೊನ್ನಾ, ಅಂಬುಜಾ ಎಂ.ಡಿ., ನಾಗರತ್ನ, ನೇತ್ರಾವತಿ, ಶಿವಾನಂದ ದ್ಯಾಮಗೊಂಡ, ಗುರುಶರಣ ನಾಗಶೆಟ್ಟಿ, ಶರಣಪ್ಪ ಶ್ರೀಗಿರಿ ಸೇರಿದಂತೆ ನೂರಾರು ನೌಕರ ಬಾಂಧವರು ಭಾಗವಹಿಸಿದ್ದರು.