ಕಲಬುರಗಿ: ಯುವ ಶಕ್ತಿಯೇ ದೇಶದ ಬೆನ್ನೆಲಬು. ಯುವಕರು ದೇಶಪ್ರೇಮ, ಮಾನವೀಯ ಮೌಲ್ಯಗಳನ್ನು ಮೈಗೂಡಿಸಿಕೊಂಡು ದೇಶಸೇವೆ ಮಾಡಬೇಕು. ಯೋಧರು ಮಳೆ-ಚಳಿ, ಬಿಸಲು, ತನ್ನ ಕುಟುಂಬ, ಬಂಧು-ಬಳಗ ಇವುಗಳನ್ನು ಲೆಕ್ಕಿಸದೆ, ದೇಶದ ರಕ್ಷಣೆಯೇ ಅವರ ಪರಮಗುರಿಯಾಗಿರುತ್ತದೆ. ಅವರಿಗೆ ಸಮಾಜದ ಸಹಕಾರ ಅಗತ್ಯವಾಗಿದೆ ಎಂದು ಮಾಜಿ ಯೋಧ ಕ್ಯಾಪ್ಟನ್ ಶರಣಪ್ಪ ಭೋಗಶೆಟ್ಟಿ ಹೇಳಿದರು.
ನಗರದ ಗೋದುತಾಯಿ ನಗರದಲ್ಲಿರುವ ‘ಅಮರ ಜವಾನ್’ ಸ್ಮಾರಕದ ಬಳಿ ಅಮರ ಜವಾನ ಯೋಧರ ತಂಡ ಮತ್ತು ‘ಬಸವೇಶ್ವರ ಸಮಾಜ ಸೇವಾ ಬಳಗ’ದ ಸಹಯೋಗದೊಂದಿಗೆ ‘ವಿ ಮೇಕ್ ಇಟ್ ಪಾಸಿಬಲ್’ ತಂಡವು ಬುಧವಾರ ಸಂಜೆ ಏರ್ಪಡಿಸಿದ್ದ ಪುಲ್ವಾಮಾ ದಾಳಿಯ ಹುತಾತ್ಮ ಯೋಧರಿಗೆ ಶೃದ್ಧಾಂಜಲಿಯ ಐದನೇ ವರ್ಷಾಚರಣೆಯಲ್ಲಿ ಪುಷ್ಪಾರ್ಚನೆ, ದೀಪ ಬೆಳಗಿಸಿ ಭಾವ ನಮನಗಳನ್ನು ಸಲ್ಲಿಸಿ ನಂತರ ಅವರು ಮಾತನಾಡುತ್ತಿದ್ದರು.
ಮಾಜಿ ಯೋಧ ಪ್ರಲ್ಹಾದ ನಳದುರ್ಗಕರ್ ಮಾತನಾಡಿ, ಯೋಧರ ಸೇವೆ ಅನನ್ಯವಾಗಿದೆ. ದೇಶದ ರಕ್ಷಣೆಯಲ್ಲಿ ಯೋಧರ ಕಾರ್ಯಕ್ಕೆ ದೇಶದ ನಾಗರಿಕರ ಪ್ರೋತ್ಸಾಹ ನೀಡವುದು ಅವಶ್ಯಕವಾಗಿದೆ. ದೇಶಕ್ಕೆ ಸೇವೆ ಸಲ್ಲಿಸುವುದಕ್ಕೆ ಯುವಕರು ಸೈನ್ಯಕ್ಕೆ ಸೇರ್ಪಡೆಗೊಳ್ಳಬೇಕು. ಸೈನಿಕರ ರಕ್ತದ ಪ್ರತಿ ಕಣದಲ್ಲಿಯೂ ದೇಶಪ್ರೇಮ ತುಂಬಿರುತ್ತದೆ. ಅಂತಹ ದೇಶಪ್ರೇಮ ಯುವಕರಲ್ಲಿ ಬರಬೇಕಾಗಿದೆ. ಜನ್ಮಭೂಮಿಯ ಋಣ ತೀರಿಸುವ ಕಾರ್ಯ ಎಲ್ಲರೂ ಕೂಡಾ ಮಾಡೋಣ. ಭಾರತ ವಿಶ್ವಗುರುವಾಗಲು ಶ್ರಮಿಸೋಣ. ನಮ್ಮ ಯೋಧರ ಬಲಿದಾನ ಮರೆಯದೆ ಶತ್ರು ರಾಷ್ಟ್ರಗಳಿಂದ ಎಚ್ಚರವಿರೋಣ ಎಂದು ಮಾರ್ಮಿಕವಾಗಿ ನುಡಿದರು.
ಮಾಜಿ ಯೋಧರಾದ ಗೋಪಾಲಕೃಷ್ಣ ಜೋಶಿ ಮತ್ತು ‘ವಿ ಮೇಕ್ ಇಟ್ ಪಾಸಿಬಲ್ ತಂಡ’ದ ಸೌರಭ ಜೇವರ್ಗಿ ಮಾತನಾಡಿದರು.
ಇದೇ ಸಂದರ್ಭದಲ್ಲಿ ‘ವಿ ಮೇಕ್ ಇಟ್ ಪಾಸಿಬಲ್ ತಂಡ’ದವರಿಂದ ನುಡಿನಮನ, ದೇಶಭಕ್ತಿ ಗೀತಗಾಯನ ಜರುಗಿತು. ಅಮರ ಜವಾನ ಸ್ಮಾರಕ ಯೋಧರ ತಂಡದವರಿಗೆ ಕಾರ್ಯಕ್ರಮಗಳು ಮಾಡಲು ಅನಕೂಲವಾಗಲಿ ಎಂಬ ಉದ್ದೇಶದಿಂದ ಬ್ಲೂಟೂತ್ ಹೊಂದಿರುವ ಸೌಂಡ್ ಸಿಸ್ಟಮ್ ಗೌರವಪೂರ್ವಕವಾಗಿ ಉಡುಗೋರೆಯಾಗಿ ನೀಡಿ, ದೇಶಪ್ರೇಮ ಮೆರೆದರು.
ಕಾರ್ಯಕ್ರಮದಲ್ಲಿ ಬಸವೇಶ್ವರ ಸಮಾಜ ಸೇವಾ ಬಳಗದ ಅಧ್ಯಕ್ಷ ಎಚ್.ಬಿ.ಪಾಟೀಲ, ಸದಸ್ಯ ಶಿವಯೋಗೆಪ್ಪಾ ಎಸ್.ಬಿರಾದಾರ, ಮಾಜಿ ಯೋಧರಾದ ಮಲ್ಲಿಕಾರ್ಜುನ ಮಡಿವಾಳ, ರಾಜೇಂದ್ರ ಶೀಲವಂತ, ಹಣಮಂತರಾಯ ಗೋಗಾಂವ, ಶಾಂತಮಲ್ಲಪ್ಪ ಪಾಟೀಲ, ಎನ್.ರಾಮಪ್ಪ, ರಾಮು ಪವಾರ, ಪ್ರಮುಖರಾದ ಸಚಿನ್, ನಿರ್ವಾಸ ಪವಾರ, ವಿಠಲರಾವ ಕುಲಕರ್ಣಿ, ನಾಗಣ್ಣ ಪಾಟೀಲ, ಹುಂಚಪ್ಪ ಸೇರಿದಂತೆ ಮುಂತಾದವರು ಭಾಗವಹಿಸಿದ್ದರು.